Gestum og íbúum fjölgar í Slakka

Búist er við að um tuttugu þúsund manns heimsæki dýragarðinn Slakka í Laugárási í sumar. Dýragarðurinn hefur verið stækkaður og hefur íbúum hans fjölgað til muna. Þetta er ellefta árið í röð sem dýragarðurinn Slakki er opinn gestum. Á blíðviðrisdögum eins og þegar Stöð 2 leit í heimsókn er margt um manninn og nóg um að vera. Krakkar í fyrsta bekk í Ártúnsskóla nutu þess að fylgjast með dýrunum í blíðunni og dýrin virtust hin rólegustu yfir þessum forvitnu gestum. Það er margt að sjá í Slakka, meðal annars hænur, folald, hunda, ref og páfagauka. Um tuttugu dýrategundir eru nú í dýragarðinum og er von á fleiri á næstunni. Garðurinn var stækkaður um páskana þegar ný innanhússaðstaða var tekin í notkun. Þar búa nú mýs, naggrísir, stökkmýs, kettir, og skrautfuglar. Og þegar búið er að skoða dýrin er hægt að fá sér í gogginn og spila mínígolf og pútta.