Umhverfisráðherra fagnar áfanganum

Ríkisstjórn Rússlands staðfesti Kyoto-bókunina í morgun og þar með virðist sem þessi sjö ára gamli samningur muni loks hljóta fullgildingu sem alþjóðasáttmáli. Umhverfisráðherra Íslands fagnar þessum áfanga og telur að þetta geti sett þrýsting á Bandaríkin um að láta af andstöðu sinni við samninginn. Kyoto-bókunin stefnir að því að draga úr loftmengun með því að setja reglur um losun gróðurhúsalofttegunda. Ísland var meðal fyrstu þjóða til að fullgilda samninginn og alls hafa hundrað tuttugu og tvær þjóðir staðfest hann. Það er hins vegar fyrst núna með þátttöku Rússa sem samningurinn verður fullgildur alþjóðasáttmáli og lagalega bindandi þar sem bíða þurfti staðfestingu þjóða sem bera ábyrgð á 55% af loftmengun heimsins. Um 17% af allri loftmengun í heiminum er rakin til Rússlands og hefðu Rússar ekki staðfest má segja að í raun hefði ekkert gagn verið af samningnum. Aðalástæðan er sú að Bandaríkin, sem er stærsta mengunarland heims og ber ábyrgð á 36% loftmengunar, neitar að vera með og vill ekki taka þátt í þeim mengunarvörnum sem felast í Kyoto-bókuninni. Ástralía og Kína standa einnig fyrir utan og vilja ekki staðfesta samninginn. Sigríður Anna Þórðardóttir umhverfisráðherra segir að staðfesting Rússa setji aukinn þrýsting á aðra að taka sig á í þessum málum. Henni finnst þetta stórfréttir og telur ákvörðun Rússa munu hafa áhrif á heimsvísu í þá veru að þrýstingur á að þjóðir heims nýti endurnýjanlega orku muni aukast. „Þar að auki setur þetta þrýsting á þær þjóðir sem hafa ekki fullgilt bókunina, þar á meðal Bandaríkjamenn,“ segir Sigríður Anna.