Vilja takmarkað botnvörpubann

Vernda þarf viðkvæm svæði á hafsbotni til að koma í veg fyrir tjón á lífríki nytjafiska í kringum landið. Þetta kemur fram í þingsályktunartillögu Vinstri grænna, sem lögð er fram í þriðja sinn á þingi nú í haust. Í tillögunni segir að stöðugt fjölgi vísbendingum um tjón á lífríki hafsbotnsins við hömlulitla notkun botnveiðarfæra. Tillaga um allsherjarbann við veiðum með botnvörpu er nú til umfjöllunar hjá Sameinuðu þjóðunum og hópur erlendra sjávarlíffræðinga og umhverfisverndarsamtaka hefur krafist þess að samtökin samþykki hana. Kolbrún Halldórsdóttir, þingmaður Vinstri grænna, segir að það kunni vel að vera að sum lífríki þoli botnvörpuveiðar en hún segist sannfærð um að þær verði að banna mjög víða. Hún segir handfæraveiðar mun umhverfisvænni og því eigi að auka vægi þeirra um öll heimshöfin. Hún vill þó ekki taka undir tillögur um allsherjarbotnvörpubann. Guðjón A. Kristjánsson, formaður Frjálslynda flokksins, segir löngu vitað að botnvarpa breyti sjávarbotninum og hann telur hafa skort á skipulegar rannsóknir á þessu. "Menn eru að stunda rannsóknir löngu eftir að búið er að slétta út kóralrifin." Hann segir kóralinn svo hægvaxta að það muni taka hann mörg hundruð ár að vaxa þar sem hann hefur verið brotinn niður á tíu til tuttugu árum. Guðjón segist samt ekki styðja hugmyndir um allsherjarbann eins og er til umfjöllunar hjá Sameinuðu þjóðunum. "Það er hins vegar mikilvægt að rannsaka þetta svo við vitum hvaða svæði ber að friða."