Þögnin er gull, segir Guðni

Forystumönnum í Framsóknarflokknum líst illa á hugmyndir sjálfstæðismanna um að gera kröfu um að 44 prósent kosningabærra manna þurfi, til að hafna lögum í þjóðaratkvæðagreiðslu. Guðni Ágústsson, varaformaður Framsóknarflokksins, hvetur til þess að ófriðaröldur verði lægðar í samfélaginu, en telur þó sjálfur mikilvægt að lágmarksskilyrði verði sett. Björn Bjarnason dómsmálaráðherra hefur lýst því yfir að hann telji eðlilegt að miða við að 44 prósent kjósenda þurfti til að fella lög í þjóðaratkvæðagreiðslu. Geir H. Haarde fjármálaráðherra hefur gengið enn lengra og nefnt 44 til 50 prósent. Samkvæmt heimildum Stöðvar 2 líst forystumönnum í Framsóknarflokknum illa á þessar hugmyndir sjálfstæðisráðherranna og telja að þær séu ávísun á áframhaldandi styrjöld í samfélaginu. Guðni Ágústsson vill ekki á þessu stigi tjá sig um 44 prósent lágmark. Hann segir framsóknarmenn þurfa að ná saman um hvar þeir vilji setja mörkin og hvort menn vilji setja mörk. Síðan sé það samstarfsverkefni við Sjálfstæðisflokkinn. Guðna sýnist hins vegar að stjórnarandstaðan vilji engin mörk og vilji láta sem málið snúist einkönum um fjölmiðlafrumvarpið. Guðni telur hins vegar mikilvægt að menn horfi til framtíðar og segir skynsamlegt að setja einhver mörk. Hann nefnir þó enga tölu en hvetur til þess að menn horfi til Danmerkur. Hann segir slík mál þróuð þar. Hann hvetur til þess að reynt verði að ná sáttum í samfélaginu því það sé mikilvægt að sá eldur sem brenni í þjóðfélaginu sé lægður. Hann vildi því minna stjórnmenn á það, að tala er silfur en þögnin er gull.