Þúsundir krafna á skuldseiga

"Það er rétt, að hér safnast upp heilmikið af beiðnum af því að við náum ekki til þessara gerðarþola vegna þess að þeir mæta ekki eða þá að við finnum þá ekki," sagði Rúnar Guðjónsson sýslumaður í Reykjavík. Yfir tíu þúsund aðfararbeiðnir liggja nú hjá sýslumannsembættinu í Reykjavík, þar sem skuldarar hafa ekki mætt til fyrirtöku, þegar þeir hafa verið boðaðir eða ekki tekist að hafa upp á þeim og reglur leyfa ekki að málum þeirra sé lokið að þeim fjarstöddum. Þetta þýðir að ekki er hægt að gera fjárnám hjá viðkomandi, en kröfuhafar sitja eftir með ólokin mál. "Við höfum eðlilega haft af þessu vaxandi áhyggjur, því við höfum ekki önnur úrræði í dag en þau sem við beitum," sagði sýslumaður. Hann kvað embættið hafa lagt fram tillögur til úrbóta fyrir dómsmálaráðuneytið. "Við höfum bent á þrjár leiðir í þessum efnum. Í fyrsta lagi er að gera lagabreytingu þannig að það megi gera fleiri fjárnám að gerðarþolum fjarstöddum heldur en gert er í dag. Með því væri hægt að ljúka fjárnámi þótt gerðarþoli mætti ekki hafi honum verið gerð grein fyrir því í boðunarbréfi að það yrði gert. Í öðru lagi að fá aukna aðstoð frá lögreglu. Hún hefur aðstoðað okkur við að færa gerðarþola hingað, en þó í litlum mæli miðað við þörf, þar sem lögreglan hefur ekki tök á að sinna nema ákveðnum fjölda mála ," sagði Rúnar. Hann sagði embættið í þriðja lagi hafa bent á það úrræði að fara oftar í fjárnám úti í bæ og hitta gerðarþola þar fyrir , það er að segja, að ljúka málum með svokölluðum "útifjárnámum. " En vegna fjárskorts hefði ekki verið hægt að sinna því sem skyldi fram til þessa. "Þetta eru atriði sem við höfum óskað eftir að dómsmálaráðuneytið aðstoði okkur við að bæta úr," sagði Rúnar, "og eftir fregnum sem ég hef þaðan er verið að skoða þetta mál þar. Við vonumst til að við fáum einhverjar úrbætur. Þetta lendir fyrst og fremst á kröfuhöfunum, en vissulega finnst okkur jafnframt leitt að geta ekki sinnt beiðnum þeirra eins og vert væri og okkur ber skylda til lögum samkvæmt."