Ronaldinho hafnaði Chelsea

Brasilíumaðurinn Ronaldinho, leikmaður Barcelona, segist hafa hafnað 55 milljóna punda tilboði frá Chelsea en hann skrifaði undir nýjan samning við Katalóníuliðið í síðustu viku sem gildir til ársins 2008. „Vitið þið af hverju ég hafnaði boði Chelsea?" spurði Ronaldinho fréttamenn og svaraði sjálfur um hæl: „Af því að ég elska fótbolta og að spila hann á aðlaðandi hátt." Hefði tilboði Chelsea verið tekið væri Ronaldinho þar með orðinn dýrasti leikmaður sögunnar en Zinedine Zidane heldur enn um skeið þeim titli en Real Madrid pungaði út 44 milljónum punda þegar hann var keyptur frá Juventus á sínum tíma.Forráðamenn Barcelona hafa veitt Ronaldinho feita launahækkun og í stað þess að fá litlar 2,5 milljónir punda í árslaun fær hann nú 3,3 milljónir. Ronaldinho kom frá franska liðinu Paris St Germain síðasta sumar og þurfti Barcelona að greiða 21 milljón punda fyrir hann og bara sem hrein fjárfesting hefur hann þegar margborgað sig. Spilamennska hans í vetur var frábær og forráðamenn Manchester United hljóta að naga sig í handarbökin en þeir drógu það of lengi að semja við Ronaldinho í fyrra sem vildi ólmur koma til liðsins. „Við erum ánægðir með þennan samning," sagði forseti Barcelona, Joan Laporta, og bætti þessu við: „Ronaldinho á þennan samning skilið því hann lagði gríðarlega mikið af mörkum í vetur og við vildum gera allt sem í okkar valdi stóð til að halda honum hjá félaginu. Ronaldinho á eftir að marka nýtt upphaf hjá Barcelona." Aðdáendur Chelsea vanda hins vegar Ronaldinho ekki kveðjurnar og segja að hann hafi einungis verið að nýta sér áhuga og tilboð Chelsea til þess að þrýsta á forráðamenn Barcelona um launahækkun. Hann hafi aldrei ætlað sér að ganga til liðs við Chelsea.