Brestir í skrokki skipsins

Brestir komu í ljós í skrokki tyrkneska súrálsskipsins Kiran Pacific þegar kafarar könnuðu botn skipsins í gærkvöldi og fram á nótt. Skipið er enn á strandstað um sex kílómetra norðvestur af Straumsvík eftir að það strandaði þar á skeri í fyrrakvöld. Vegna þessa munu sérfræðingar jafnvel telja nauðsynlegt að létta skipið með því að flytja farminn yfir í annað skip, áður en reynt verður að draga það af skerinu, af ótta við að byrðingur skipsins kunni að bresta og sjór flæða í lestar þess. Vitað er að leki kom að stafnhylki og einhverjum botntönkum en engin olía hefur lekið frá skipinu. Áhöfnin er enn um borð en varðskip er á vettvangi og fylgjast fulltrúar Siglingastofnunar, Landhelgisgæslunnar og Umhverfisstofnunar grannt með framvindu mála. Fulltrúar eigenda og tryggingafélags skipsins eru einnig komnir til landsins.