Barði Sri með þungu barefli

Hákon Eydal játaði í gær að hafa orðið barnsmóður sinni, Sri Rahmawati, að bana sunnudaginn 4. júlí. Hann hefur setið þögull í gæsluvarðhaldi í þrjár vikur og var það fyrst í fyrradag sem hann greindi lögreglu frá því hvar hann hefði komið líkinu fyrir. Samkvæmt heimildum Fréttablaðsins barði hann Sri til bana með þungu barefli. Hákon varð Sri að bana á heimili sínu í Stórholti. Í framhaldinu flutti hann líkið í jeppabifreið sinni í Hólsvík á Kjalarnesi þar sem fjölskylda hans á sumarbústað. Á mánudag vísaði Hákon lögreglu á Presthúsaskaga og sagðist hafa varpað líkinu í sjóinn fram af klettum. Hákon var handtekinn þriðjudaginn 6. júlí eftir að lögregla fann blóð og merki þess að glæpur hefði verið framinn í íbúðinni. Daginn eftir var hann úrskurðaður í gæsluvarðhald í tvær vikur, sem síðar var framlengt um þrjár vikur. Fyrir um viku síðan var ljóst að blóð sem fannst í íbúð hans var allt úr Sri. En beðið hafði verið í nokkurn tíma eftir að niðurstöður úr DNA rannsóknum bærust frá Noregi. Eftir þá staðfestingu var hvarf Sri formlega rannsakað sem morðmál eins og lögregla hafði grunsemdir um í fyrstu. Hákon hefur lýst lögreglu í smáatriðum frá verknaðinum en þær upplýsingar fást ekki hjá lögreglu að svo stöddu. Þegar Fréttablaðið fór í prentun í gær var lík Sri ófundið þrátt fyrir umfangsmikla leit. Níu kafarar hafa leitað hennar auk þess sem fjörur hafa verið gengnar. Í gær var leitað að Sri í sjónum við Hólsvík auk þess sem fjörur, sker og eyjar í sundunum voru gengnar.