12 syntu að Bessastöðum

Tólf fræknir sundmenn fengu kaffi og pönnukökur á Bessastöðum að launum fyrir að synda Bessastaðasund í dag til heiðurs Eyjólfi Jónssyni sundkappa, sem vann slíkt afrek fyrir rúmum fjörutíu árum. Eyjólfur verður áttræður á næsta ári og hann var mættur í Ægissíðuna laust fyrir hádegi þegar félagar í Sjósundfélagi íslands og Sjósundfélagi lögreglunnar óðu út í ískalt Atlantshafið. Markmið þeirra var að synda yfir Skerjafjörð og ná landi á Álftanesi en vegalengdin þarna yfir er um 2 og hálfur kílómetri. Og þetta er bara fyrir mestu hraustmenni því hiti sjávar mældist ekki nema fjórar og hálf gráða. Áætlað var á sundið tæki um eina klukkustund en í fjöruborðinu á Alftanesi biðu sjálf forsetahjónin að taka á mótu görpunum. Að þessu sinni var ákveðið að skiptast á og synda boðsund en fyrir 42 árum synti Eyjólfur þetta einn. Barnabarn hans og alnafni, aðeins fimmtán ára gamall, var í hópi þeirra sem syntu síðasta spölinn og honum og félögum hans var vel fagnað þegar landi var náð. Það var sjálf forsetafrúin sem tók á móti pilti og faðmaði hann að sér um leið og mamma breiddi hlýtt handklæði yfir son sinn. Forsetinn fagnaði einng sundgörpunum en þetta er ekki í fyrsta sinn sem slíkt er gert á þessum stað. Það sama gerði Ásgeir Ásgeirsson árið 1962 þegar Eyjólfur synti þessa leið en að þessu sinni sigldi Eyjólfur með einum fylgdarbátnum en óð svo berfættur í land. Þar tók forsetinn á móti þssum einum fræknasta sundkappa Íslands en Eyjólfur afhenti forsetanum að gjöf nýútkomnar æviminningar sínar. Eyjólfur rifjaði upp þegar hann hitti Ásgeir Ásgeirsson forseta í Vesturbæjarlauginni. Hann segir að Ásgeir hafi í eitt skipti boðið sér til Bessastaða með því skilyrði að hann kæmi syndandi, sem hafi orðið úr. Og eins og þá fékk Eyjólfur ásamt sundköppunum í dag að launum kaffi og pönnukökur á Bessastöðum.