Eiríkur og Stefán Már hæfastir

Tveir umsækjendur, þeir Eiríkur Tómasson og Stefán Már Stefánsson, eru sagðir hæfastir í starf hæstaréttardómara að mati Hæstaréttar samkvæmt heimildum Fréttablaðsins og að því er fram kom í fréttum Ríkisútvarpsins í gær. Fimm af sjö umsækjendum sem Fréttablaðið náði tali af í gær vissu ekki að mat Hæstaréttar lægi fyrir eða höfðu aðeins heyrt um það í fréttum RÚV. En samkvæmt upplýsingalögum eiga ekki aðrir en umsækjendur rétt á því að sjá umsögn Hæstaréttar. Auk lagaprófessoranna, Eiríks Tómassonar og Stefáns Más Stefánssonar, sóttu Allan Vagn Magnússon héraðsdómari, Eggert Óskarsson héraðsdómari, Hjördís Hákonardóttir dómstjóri, Jón Steinar Gunnlaugsson hæstaréttarlögmaður og Leó Löve hæstaréttarlögmaður um stöðuna. Pétur Kr. Hafstein lætur af embætti hæstaréttardómara þann fyrsta október næstkomandi. Björn Bjarnason dómsmálaráðherra skýrði frá því á heimasíðu sinni að hann hefði í bréfi til forsætisráðherra lýst sig vanhæfan í þessari embættisskipan. Ástæðan er sú að Hjördís Hákonardóttir dómstjóri er meðal umsækjenda. Hún var einnig meðal umsækjenda þegar Björn skipaði Ólaf Börk Þorvaldsson í embætti hæstaréttardómara 2003. Kærunefnd jafnréttismála komst að þeirri niðurstöðu að sú ákvörðun hefði verið brot á jafnréttislögum og beindi því til Björns að finna "viðunandi lausn" á því máli. "Meðan þær hafa ekki verið til lykta leiddar tel ég að aðrir umsækjendur megi með réttu draga í efa óhlutdrægni mína við val á umsækjendum í það embætti sem nú er laust," segir Björn í bréfi sínu til Davíðs. Samkvæmt heimildum Fréttablaðsins hefur Hjördís átt í viðræðum við dómsmálaráðuneytið um bætur vegna úrskurðar kærunefndar jafnréttismála. Forseti Íslands hefur að tillögu forsætisráðherra sett Geir H. Haarde fjármálaráðherra tímabundið í embætti dómsmálaráðherra til að taka ákvörðun um veitingu embættis hæstaréttardómara.