Umferðarmet í Ártúnsbrekku

Nýtt umferðarmet hefur verið slegið á fjölförnustu götu landsins, Ártúnsbrekku. Um áttatíu og fimm þúsund bílar hafa ekið hana á einum sólarhring. Meðalhraði í götunni er talsvert yfir löglegum mörkum. Á haustin, þegar skólarnir byrja, verður yfirleitt vart við aukinn umferðarþunga á helstu vegum borgarinnar og þeir eru vafalaust margir ökumennirnir sem bólsótast yfir því að sitja fastir í umferðarteppu á leið í og úr vinnu. Evrópsk samgönguvika stendur nú yfir en tilgangur hennar er að vekja almenning til umhugsunar um umferðarmenningu og er meginþemað í ár öryggi barna í umferðinni. Ljóst er að aukinn bílafloti landsmanna hefur leitt til meiri umferðarþunga og samkvæmt tölum úr svökölluðum umferðargreinum, sem staðsettir eru í Ártúnsbrekku, á Kringlumýrarbraut, við Sæbraut, og Miklubraut, hafa ný umferðarmet verið slegin. Björg Helgadóttir, landfræðingur hjá Reykjavíkurborg, segir Ártúnsbrekkuna ávallt vera hæsta og þar var slegið met í ágúst þegar 85 þúsund bílar fóru þar um á einum sólarhring. Topparnir undafarið hafa verið 81-83 þúsund bílar sem örlítið meira en á sama tíma í fyrra. Umferðargreinarnir gefa meðal annars upplýsingar um fjölda og hraða bifreiða en út frá umferðartölunum er unnið að framtíðarspám og hönnun umferðarmannvirkja. Hægt er að fylgjast náið með því hvar og hvenær umferðarþunginn er mestur á morgnana og síðdegis. Síðasta sólarhring hafa til að mynda 517 ökumenn ekið á meira en 110 kílómetra hraða í Ártúnsbrekkunni, þar sem hámarkshraðinn er 80 kílómetrar, og þegar litið er á samskonar tölur aðeins fyrr í vikunni kemur í ljós að þessi fjöldi er mun meiri. Björg segir þetta alltof háa tölu og vonast hún efir því að breyting verði þar á með aukinni vitund borgarbúa um umferðina.