Jón Arnór með gegn Dönum í dag

Íslenska landsliðið í körfuknattleik er statt í Danmörku um þessar mundir en liðið mætir heimamönnum í undankeppni Evrópukeppninnar í dag. Liðið hefur æft grimmt síðan í vor og gert ágætis hluti í æfingaleikjum sumarsins. Sigurður Ingimundarson, þjálfari landsliðsins, sagðist þekkja andstæðinginn ágætlega. "Ég þekki Danina nokkuð vel. Þetta er gott lið sem er á svipuðum styrkleika og við en eru náttúrlega á heimavelli. Engu að síður ætlum við að leika okkar besta leik í sumar og vinna" sagði Sigurður. Sigurður tók við liðinu af Friðriki Inga Rúnarssyni og hefur náð ágætis árangri. "Ég hef ekki gert neinar dramatískar breytingar en leikstíllinn sem ég lagði upp með er grimmur varnarleikur og pressa um allan völl. Hraður leikur, líf og fjör á vellinum. Það hefur gengið vel. Það tekur tíma og átak að koma inn svona leikskipulagi í ungt lið og fá alla til að spila á sama hraðanum. Fyrir þennan leik höfum við spilað 10 leiki og æft síðan í lok apríl. Það kostar tíma og hörkuvinnu að kom liði áfram í svona riðlakeppni. Jón Arnór smellpassar inn Jón Arnór Stefánsson er okkar þekktasti leikmaður en dvöl hans hjá Dallas Mavericks í NBA-deildinni vakti mikla athygli hér heima þó henni sé nú lokið. Jón, sem leikur í Rússlandi, verður með í leiknum gegn Dönum. "Þetta er fyrsti alvöru leikurinn hjá honum en Jón er náttúrlega búinn að vera á fullu í sumardeild NBA og sínu nýja liði, Dynamo St. Petersburg. Hann hefur staðið sig feiknavel og veit nákvæmlega að hverju hann gengur hjá okkur. Þetta er leikstíll sem hann virkar best í og á eftir að smellpassa eins og hver annar leikmaður. Hann er náttúrlega mikill liðsspilari þannig að ég hef engar áhyggjur af honum," staðhæfði Sigurður. Bandaríkjamenn ennþá bestir Landsliðsþjálfarinn var spurður álits á bandaríska Draumaliðinu og þeirri hnignun sem hefði átt sér stað á körfuboltanum í Bandaríkjunum. "Það eru stórstígar framfarir í körfuboltanum um allan heim en við Evrópumennirnir erum nú ekkert að fara framúr Bandaríkjamönnum. En það var virkilegt skemmtilegt að fylgjast með liðum eins og Nýja-Sjálandi sem lék hörkuvel á Ólympíuleikunum. Þetta sýnir að körfuboltinn er fantagóður í öllum heimsálfum en Bandaríkjamenn eru samt enn þá fremstir þó að Argentínumenn hafi unnið. Gaman er að sjá að þjóðir eins og Kínverjar eru farnir að spila við bestu þjóðir heims og það segir okkur að framfarirnar eru miklar um allan heim. Kanarnir eiga sjálfsagt eftir að laga til í sínum herbúðum fyrir næstu keppni sem þeir taka þátt í," sagði Sigurður að lokum. Ísland mætir Danmörku kl. 17 í dag og hægt er að sjá leikinn í Ölveri í Glæsibæ á risatjaldi.