Heimir rekinn - Magnús tekur við

Heimi Karlssyni hefur verið sagt upp störfum sem þjálfara 2. deildarliðs ÍR í knattspyrnu. Við starfi hans tekur Magnús Þór Jónsson en hann var aðstoðarþjálfari liðsins. ÍR-ingum hefur gengið illa það sem af er sumri og eru nú í 7. sæti deildarinnar, aðeins einu stigi frá fallsæti. Liðið hefur leikið níu leiki í röð án sigurs, eða frá því í fimmtu umferð, en þá voru Víkingar frá Ólafsvík lagðir að velli. Heimir Karlsson tók við þjálfun ÍR-inga í haust en óhætt er að segja að félaginu haldist ekki vel á þjálfurum meistaraflokksins - Magnús Þór Jónsson er nú orðinn fimmti þjálfarinn síðan í ágúst árið 2002 en þá lét Guðmundur Torfason af störfum. Við starfi hans tók Ólafur Jóhannesson en hann staldraði stutt við. Kristján Guðmundsson stýrði liðinu svo síðastliðið sumar.