Losun koldíoxíðs jókst um 67 %

Losun koldíoxíðs frá umferð vöruflutningabíla jókst um 67 prósent frá árinu 1983 til 2002, segir í tilkynningu Landverndar, landgræðslu- og umhverfisverndarsamtaka Íslands. Samtökin telja ávinning strandsiglinga fjölþættan og að rík ástæða sé til að efla þá hér við land, í stað þess að hætta þeim eins og Eimskipafélag Íslands hyggst gera 1. desember. Landvernd segir að ákvörðun Eimskips vekji spurningar um viðbrögð stjórnvalda til að koma í veg fyrir neikvæða þróun af auknum landflutningum, sem sé ekki eingöngu bundið við slys og vegslit heldur einnig aukið magn koldíoxíðs í andrúmsloftinu.