Spáin sjaldan gengið betur eftir

Veðurstofa Íslands segir að sjaldan hafi spár gengið betur eftir en einmitt nú um þessa Verslunarmannahelgi og svarar þannig athugasemdum um veðurspár síðustu daga. Í tilkynningu kemur fram að allt frá miðri síðustu viku hafi verið spáð vætusamri helgi um sunnanvert landið en úrkomulitlu veðri nyrðra. Gert hafi verið ráð fyrir að nokkur úrkomusvæði gengu yfir landið úr suðri þessa daga og er tímasetning þeirra sögð hafa staðist í meginatriðum. Bent er á að helstu úrkomusvæðin hafi gengið yfir síðla nætur, snemma morguns og á ferðatímum. Þannig hafi mótsgestir og aðrir landsmenn sunnanlands notið sólarglennanna á milli þeirra þrátt fyrir smáskúrir, enda hafi verið hlýtt í veðri. Magnús Jónsson, veðurstofustjóri, segir í tilkynningu að stofnuninni þyki gott að fá málaefnalega gagnrýni en vilji vera laus við að vera höfð fyrir rangri sök.