Tæpir hundrað kílómetrar að baki

Leiðangur tveggja blindra kajakræðara og tveggja aðstoðarmanna niður austurströnd Grænlands gengur vel. Tæpir hundrað kílómetrar voru að baki fyrrakvöld en lagt var af stað frá Kulusuk á föstudag. "Þeir þurftu svolítinn tíma til þess að stilla sig saman en eftir það hefur þetta gengið vonum framar," segir Þorbjörg María Ómarsdóttir, einn tengiliða kajakmannanna. "Það er engin augljós verkaskipting til að byrja með og þeir urða að finna út í aðstæðunum hversu mikið þeir blindu ráða við." Þorbjörg María segir að ef veður helst gott geti kajakmennirnir róið um 35 kílómetra á dag. "Þá er þetta komið á mjög gott ról og með því halda þeir tímaplanið algjörlega," segir Þorbjörg María en áætlað er að ferðin til byggða sunnan við Hvarf taki sex til átta vikur, um þúsund kílómetra vegalengd. Leiðangurinn er róinn til styrktar Blindrafélaginu og er áheitum safnað á heimasíðu leiðangursins, www.internet.is/leidangur.