Aflaverðmæti minna en í fyrra

Aflaverðmæti íslenskra skipa á fyrstu fjórum mánuðum ársins er 24,8 milljarðar króna, samkvæmt tölum frá Hagstofunni. Þetta er aðeins minna samanborið við sama tímabil á síðasta ári þegar aflaverðmæti var 25,1 milljarður. Samdráttur á aflaverðmæti nemur því um 330 milljónir. Aukning var í verðmæti botnfiskaflans, þorsks og ýsu en samdráttur í verðmæti karfa, loðnuafla og skel- og krabbadýraafla. Verðmæti afla í beinni sölu útgerða til vinnslustöðva minnkaði um 5,8 prósent en sama verðmæti var á sjófrystum afla á fyrstu fjóru mánuðum í ár og í fyrra. Verðmæti afla sem seldur var á fiskmörkuðum til fiskvinnslu innanlands dróst saman. Mestur samdráttur milli ára varð á Austurlandi en á Suðurnesjum var unnið úr afla að verðmæti 5,1 milljarður króna sem er aukning um tæp 3 prósent. Þá jókst verðmæti afla íslenskra skipa sem unninn var erlendis.