Bjargað úr sjónum við Vík

Björgunarsveit var kölluð út um áttaleytið í gærkvöldi til aðstoðar við erlendan ferðamann sem var í sjónum fyrir utan Vík í Mýrdal, en nærstaddir náðu að bjarga manninum áður en björgunarmenn komu á vettvang. Björgunarmenn í Vík telja það algjört glapræði að synda á þessum slóðum, sérstaklega þegar sjór er úfinn eins og var í gærkvöldi. Maðurinn var hætt kominn á tíma og má teljast mikil mildi að hann skildi bjargast, en þarna er mjög sterkur útfallsstraumur þegar komið er út fyrir brimgarð. Maðurinn hafði verið á sundi í sjónum ásamt félaga sínum, en þeir hafa stundað sjósund erlendis. Félagi mannsins komst í land án vandræða en ferðafólk sem var á staðnum tókst að bjarga hinum í land.