Enn leitað að Sri

Kafarar lögreglunnar og björgunarsveitarmenn munu í dag halda áfram leit að líkinu af Sri Ramawati, konunni sem saknað hefur verið í tæpan mánuð, eftir að fyrrverandi sambýlismaður hennar játaði í gær að hafa kastað líkinu í sjóinn við Prestshúsatanga á Kjalarnesi. Maðurinn, sem er í gæsluvarðhaldi á Litlahrauni féllst síðdegis í gær að vísa leitarmönnum á staðinn og var honum þá þegar ekið á vettvang, þangað sem komið var um klukkan hálf sjö í gærkvöldi. Strax að því loknu var honum ekið aftur í fangelsið, en lögreglan tilkynnti aðstandendum konunnar þetta í gær. Þar með voru loks öll tvímæli tekin af um það að konan væri látin. Hann hefur hinsvegar ekki enn játað að hafa ráðið henni bana, en hann verður yfirheyrður nánar í dag. Um það bil 120 björgunarsveitarmenn og kafarar úr sérsveit Ríkislögreglustjóra leituðu að líki konunnar í allt gærkvöld án árangurs og er ráðgert að halda leitinni áfram í síðdegis í dag. Grunnsævi er við klettana á Kjalarnesi, en þar er nokkuð straumhart. Björgunarmenn ætla meðal annars að ganga strendur eyjanna á sundunum og fjörur á landi allt að Hvalfjarðagöngum í norður og  að Garðabæ í suður. Leitað verður líka á björgunarskipi og á slöngubátum.