Vörugjald áfengis hækkar um 200%

Fjármálaráðherra hefur hækkað vörugjöld á áfengi um tæp 200% samkvæmt nýrri gjaldskrá. Fyrir mánuði lýsti samgönguráðherra því yfir að lækka yrði skatta á áfengi. Eftir hækkunina eru gjöld á áfengi 983 krónur á tonn en var 346 krónur. Á næstu mánuðum kemur í ljós hvort heildsalar slái af álagningu sinni eða hvort það kemur í hlut neytenda að greiða mismuninn. Töluvert hefur verið rætt um hátt verð á áfengi hér á landi, ekki síst í tengslum við ferðaþjónustu. Samtök verslunarinnar hafa bent á að í stjórnarsáttmálanum komi fram að bæta skuli umhverfi hennar en Ísland er nú í fyrsta sæti á breskum lista yfir dýrustu ferðamannalönd heims. Samtökin hafa einnig bent á að skattur stjórnvalda á áfengi sé út úr öllu korti miðað við það sem almennt þekkist. Undir það sjónarmið tekur Sturla Böðvarsson samgöngumálaráðherra. Í fréttum Ríkisútvarpsins þann 23 . júní síðastliðinn sagði hann að lækka yrði skatta á áfengi ef þörf sé á því fyrir íslenska ferðaþjónustu og að óhjákvæmilegt væri að taka málið upp. Nokkrum dögum síðar mátti þó heyra Geir H. Haarde fjármálaráðherra, í sama fjölmiðli, slá þessar hugmyndir ferðamálaráðherra af borðinu. Hann sagði þá stefnu hafa verið uppi hjá Íslendingum að leggja há gjöld á áfengi sem lið í forvarnaraðgerðum. Hann benti jafnframt á að áfengisskattar hefðu ekki hækkað hér á landi í nokkur ár og því lækkað að raungildi. Með tæplega 200 prósenta hækkun á vörugjöldum nú má þó búast við að áfengið haldi áfram að leggja ríkissjóði til dágóðar tekjur.