Áfengisauglýsingar Moggans kærðar

Morgunblaðið auglýsir áfengi í tímariti um helgina þrátt fyrir blátt bann við slíkum auglýsingum í lögum. Hildur Hafstein hjá Lýðheilsustofnun segir að auglýsingarnar verði kærðar. Hún segir nauðsynlegt að gera lög um áfengisauglýsingar skýrari en þau séu margoft brotin.  Lögregla og Áfengis- og vímuefnaráð, sem nú er hluti af Lýðheilsustofnun, eiga að framfylgja banni við áfengisauglýsingum. Þrátt fyrir það hefur borið á því margsinnis að brotið sé gegn banninu, bæði beint og óbeint, nú síðast af Morgunblaðinu sem birtir fjórar áfengisauglýsingar í tímariti um mat og vín um helgina, fyrir utan hefðbundnar kynningar á víni. Dómsmálaráðherra sagði á Alþingi í vetur að ekki léki neinn vafi á því að lögin væru í fullu gildi og benti á úrskurð Hæstaréttar frá árinu 1998 því til staðfestingar. Þar kemur fram að þau brjóti hvorki í bága við stjórnarskrá Íslands né mannréttindasáttmála Evrópu. Anna Elínborg Gunnarsdóttir, ábyrgðarmaður tímaritsins sem er gefið út af Árvakri og fylgir Morgunblaðinu, sinnti ekki skilaboðum Stöðvar 2 .Hildur Hafstein hjá Lýðheilsustofnun segir að oft hafi verið send erindi til saksóknara vegna óbeinna auglýsinga, þ.e.a.s. vínkynninga. Morgunblaðið hafi hér gengið skrefinu lengra en borið hafi á beinum auglýsingum í fjölmiðlum undanfarið. Hún segir lögin vera til að vernda börn, unglinga og þá sem kannski á einhvern hátt standi höllum fæti, en ekki fullorðið fólk sem kunni og geti farið með vín. Hildur segir forgangsmarkmiðið í heilbrigðisáætlun Lýðheilsustofnunar vera að draga úr áfengisneyslu landsmanna. Því sé nauðsynlegt að skýra lögin betur svo unnt sé að framfylgja þeim á ákveðnari hátt en gert sé. Svo virðist sem menn geri sér það hreinlega að leik að fara í kringum þau að sögn Hildar. Viðurlögin við brot á lögunum eru sektir og segir Hildur það vera hugsanlegt að menn auglýsi, þrátt fyrir að eiga þá sektir yfir höfði sér, vegna þess að sölutekjurnar séu hærri en sektarupphæðirnar.