Yfirbugaður með veiðiriffil

Engan sakaði þegar sérsveitarmenn og lögregla á Akureyri yfirbuguðu mann í gærkvöld sem braust inn í hús á staðnum vopnaður veiðiriffli. Maðurinn var undir áhrifum fíkniefna. Lögreglan á Akureyri fékk aðstoð sérsveitarmanna á Akureyri við handtökuna og beðið var um aðstoð frá sérsveitinni í Reykjavík en beiðnin var afturkölluð þegar maðurinn hafði verið handtekinn. Ólafur Ásgeirsson, lögreglumaður á Akureyri, segir að tilkynning hefði borist um háttalag mannsins klukkan hálf tíu í gærkvöld. Þá hafi allt verið sett í gang og lögreglan hafi fljótlega komist í samband við manninnn þegar hann hringdi í lögregluna. Í kjölfarið hafi verið hægt að staðsetja hann og lögreglan fór svo í humátt á eftir honum, auk þess að loka götum og kalla út fleiri menn.  Maðurinn sem er á þrítugsaldri veifaði kraftmiklum veiðiriffli, sem hann tók ófrjálsri hendi í heimahúsi fyrr um kvöldið, og skaut þremur skotum út í loftið. Lögreglan vissi að hann ætlaði inn í hús við Aðalstræti að gera upp sakir við mann sem honum hafði sinnast við fyrr um daginn. Þess vegna var götunni lokað og fólki beint frá. Eftir að hafa brotist inn í húsið við Aðalstræti, sem var mannlaust, gafst maðurinn upp og var færður í fangaklefa um klukkan ellefu. Ólafur Ásgeirsson segir manninn hafa gefist upp svo gott sem mótþróalaust. Hann hafi hins vegar viljað fá lögreglumanninn, sem hann talaði fyrst við í símann, á staðinn. Orðið var við þeirri beiðni og í kjölfarið náði lögreglan vopninu af honum og handtók hann í framhaldinu.