Niðurstöður áratugsvinnu

Formaður Alþjóða hvalveiðiráðsins leggur til að hvalveiðar í atvinnuskyni verði leyfðar á nýjan leik eftir tæplega tveggja áratuga hvalveiðibann á ársfundi ráðsins sem hefst í Sorrento á Ítalíu á morgun. Stefán Ásmundsson, formaður íslensku sendinefndarinnar í Alþjóða hvalveiðiráðinu, segir tillögurnar í raun vera niðurstöðu áratugsvinnu. Stefán segir að eftir að Daninn Henrik Fischer hafi tekið við formennsku í Alþjóða hvalveiðiráðinu á síðasta ári hafi hjólin farið að snúast í málinu. Hann hafi kallað saman fulltrúa ýmissa ríkja, þ.á m. Stefán, og sá hópur hafi byrjað að vinna af krafti í málinu. Stefán segir að á síðustu tíu mánuðum hafi orðið meiri framgangur í málinu en síðustu tíu árin þar á undan. Aðspurður með hvaða hætti þessar hvalveiðar yrðu segir Stefán að útreikningur kvóta myndi byggjast á niðurstöðum vísindanefdar hvalveiðiráðsins frá því fyrir um áratug. Drög að eftirlitskerfi lægju fyrir til að koma í veg fyrir að ekki yrði veitt umfram kvótann.   Stefán leggur þó áherslu á að hann telur litlar líkur á að tillögurnar verði samþykktar á þessum fundi. Hann hefur hins vegar nokkra trú á að gengið verði frá samkomulaginu á ársfundinum á næsta ári eftir að vinnslu ýmissa smáatriða er lokið, þó ekkert sé öruggt í þessum efnum vegna andstöðu ýmissa ríkja við hvalveiðar í atvinnuskyni.  Stefán segir þetta vera stærsta skrefið fram á við í mjög langan tíma innan Alþjóða hvalveiðiráðsins. Hann segir það ekki nokkrum vafa undirorpið að í húfi séu miklir hagsmunir fyrir Íslendinga. Þegar og ef tillögurnar verði samþykktar gætum við stundað hvalveiðar í atvinnuskyni samkvæmt stjórn ráðsins sem er vitanlega ekki jafn umdeilt og veiðar án samþykkis þess. Ársfundur Alþjóða hvalveiðiráðsins hefst, sem fyrr segir, á morgun og stendur fram á fimmtudag. Hægt er að hlusta á fréttina og viðtal við Stefán með því að smellla á hlekkinn sem fylgir fréttinni.