Eignarnám fimm jarða

Landsvirkjun hefur óskað eftir leyfi iðnaðarráðherra til að krefjast eignarnáms á fimm jörðum á Héraði vegna rafmagnslína frá Kárahnjúkavirkjun.  Raforka frá Kárahnjúkavirkjun verður flutt að álveri Fjarðaáls við Reyðarfjörð með tveimur línum, Fljótsdalslínum 3 og 4, sem byggðar eru fyrir 420 kílóvolt en verða reknar á 220 kílóvoltum. Þær verða að mestu lagðar samsíða um 50 kílómetra leið um Fljótsdalshrepp, Austur-Hérað og Fjarðabyggð en vegna snjóflóðahættu fer önnur línan um Hallsteinsdal og hin um Þórudal. Rofna þá tæplega báðar í einu ef óhapp verður en álverið er háð stöðugum straumi. Vinna fer að hefjast við lagningu línanna en kostnaðurinn er um tíundi hluti kostnaðar við Kárahnjúkavirkjun samtals. Albert Guðmundsson, verkfræðingur hjá Landsvirkjun, segir rúma átta milljarða fara í þennan hluta framkvæmdarinnar; 4,3 milljarðar fari í línurnar, um 3 milljarðar í tengivirki í Fljótsdal og afgangurinn sé kostnaður vegna tengingar byggðalínu við Kárahnjúkavirkjun. Aðspurður hvort fullkomin sátt sé um línurnar segir Albert að Landsvirkjun hafi leitað samninga um stæði fyrir línurnar við þá tuttugu aðila sem í hlut áttu og sátt hafi náðst við fimmtán þeirra. Hann segir að ekki þurfi að breyta línunni vegna þessa en óskað hafi verið eftir því við iðnaðarráðuneytið að fá að taka land eignarnámi vegna framkvæmdanna.   Yfir fimm bændum vofir því eignarnám þar sem þeir hafa ekki viljað skrifa undir samninga við Landsvirkjun. Sigurður Arnarson, bóndi á Eyrarteigi, er einn þeirra og segir hann fyrirtækið ætla að bæta mönnum þann skaða sem þeir verði fyrir. Í sínu tilfelli sé það íbúðarhúsið sem er í innan við 150 metra fjarlægð frá línunni en boð Landsvirkjunar upp á 1,2 milljónir til að bæta þann skaða sé nokkuð sem hann muni að sjálfsögðu ekki samþykkja, segir Sigurður. Möstrin, sem mörg hver verða V-laga, eru allt að 35 metra há og án efa áberandi í umhverfinu, síður þó þegar þau veðrast. Albert segir V-lögunina vera hagkvæmasta formið til að halda uppi slíkum leiðurum en sitt sýnist hverjum um útlitið. Hann segir samt sæmilega sátt vera um möstrin. Sigurður segir málið líklega fara fyrir matsnefnd eignarnámsbóta og þá sé að sjá hvort hún sé sama sinnis og Landsvirkjun um að þetta hafi engin áhrif á verð landsins og heilsu þeirra sem í húsi hans búi.