Ísland lækkar á lista

Ísland lækkar á lista Sameinuðu þjóðanna yfir lífsgæði, sem birtur var í dag. Hér á landi er stöðnun, en merkja má framfarir víða annars staðar. Í þróunarlöndum valda fátækt og sjúkdómar hins vegar afturför. Lífsgæðavísitala Sameinuðu þjóðanna mælir árangur þjóða út frá þremur grundvallarþáttum. Hversu lengi og vel borgarar þeirra lifa; menntun, sem mæld er út frá því hversu stór hluti fullorðinna er læs sem og hve margir sækja grunnskóla, og svo lífsgæðin sjálf, það er kaupmáttur miðað við þjóðarframleiðslu. Ísland hefur verið ofarlega á listanum og svo er enn, en í þetta skiptið mun neðar en síðast. Ísland var síðast í öðru sæti á eftir Noregi, og næst komu Svíþjóð, Ástralía og Holland. Nú er Ísland hins vegar í sjöunda sæti, á eftir Noregi, Svíþjóð, Ástralíu, Kanada, Hollandi og Belgíu. Ástæðan er þó ekki sú, að lífsgæði hér á landi hafi minnkað, heldur hafa þau einfaldlega aukist til muna í hinum löndunum. Nýju tölurnar eru fyrir árið 2002, og samkvæmt þeim lifa Íslendingar örlítið lengur, sem eru góðu fréttirnar, en menntunarstigið lækkar úr 91 í 90, lægsta stig á topp tíu fyrir utan Japan. Þjóðarframleiðsla á hvern íbúa minnkar jafnframt úr 29. 990 dollurum í 29. 750 dollara. Alls má segja að hér á landi ríki stöðnun, sem verður ekki sagt um þróunarlöndin sem eru neðst á lista 177 ríkja. Þar má merkja afturför, það er að segja þar er meiri fátækt og minni lífslíkur, einkum vegna alnæmis. Lífslíkur í sumum ríkjum sunnan Sahara-eyðimerkurinnar eru undir fjörutíu árum.