Engin skólagjöld í grunnnámi

Menntamálaráðherra telur ekki rétt að taka skólagjöld af nemum í grunnnámi við Háskóla Íslands. Öðru máli gegni hins vegar um gjöld fyrir framhaldsnám. Rektor Háskólans fagnar ummælum ráðherra, en segir að Háskólinn þurfi eftir sem áður meira fé frá hinu opinbera. Þetta er í fyrsta sinn sem Þorgerður Katrín menntamálaráðherra segir þá skoðun sína opinberlega að ekki beri að taka upp skólagjöld fyrir grunnnám við Háskóla Íslands. Hún segir það koma til að mörgu. Það hafi tekist að fjölga háskólanemum svo um munar. Frá árinu 2000 hafi háskólanemum fjölgað um 50 % og útgjöldum í samræmi við það. Menntun sé orðin svo almenn að það sé ekki rétt að setja á skólagjöld í grunnnámi. Páll Skúlason, rektor Háskóla Íslands, fagnar því að menntamálaráðherra skuli láta í ljós svo afdráttarlausa og skýra afstöðu. Hann segir hins vegar að fjárframlög til Háskólans þurfi að hækka hvað sem líði skólagjöldum. Verið sé að stórefla rannsóknir og meistara og doktorsnám sé að blómstra þannig að það þurfi að efla Háskóla Íslands og skólagjöldin séu ekki eina leiðin til þess En þrátt fyrir að Menntamálaráðherra og rektor séu sammála um skólagjöldin er Þorgerður ekki tilbúin að samþykkja þau sjónarmið rektors að fjárframlög til Háskólans þurfi að hækka hvað sem skólagjöldunum líður. Hún segir Háskóla Íslands hafa fengið mikla aukningu á sínum fjárframlögum eins og aðrir háskólar því fjölgun í þá hafi verið mjög mikil. Hins vegar standi Háskóli Íslands mun betur að vígi en aðrir háskólar því hann fái mun meira rannsóknarframlag.