Enginn greinst með HIV á árinu

Enginn Íslendingur hefur greinst með HIV-smit það sem af er árinu. Síðustu ár hafa að meðaltali um tíu manns smitast hér á landi árlega og fer hlutfall kvenna hækkandi. Yfirlæknir hjá Sóttvarnalækni segir lífslíkur smitaðra og lífsgæði hafa aukist mjög á síðustu árum en að enn sé þörf á öflugri fræðslu fyrir ungt fólk. 35 Íslendingar hafa látist úr alnæmi en alls hefur 171 Íslendingur greinst með HIV-smit. Það sem af er ársins hefur þróunin hins vegar verið afar jákvæð. Þórólfur Guðnason, yfirlæknir hjá Sóttvarnalækni, segir að enginn hafi greinst með veiruna á þessu ári en meðaltalið hingað til hefur verið tíu smit á ári. Þórólfur segir að á síðustu árum sé það aðallega gagnkynhneigt fólk sem smitist, og hann segir hlutfall kvenna fara stighækkandi, til að mynda hafi 10 greinst smitaðir í fyrra, þar af voru fjórar konur. Þórólfur segir að stór hópur fólks fari í alnæmipróf á ári hverju, og að Alnæmissamtökin hafi haldið uppi öflugu fræðslu og forvarnarstarfi á meðal ungs fólks. Hann segir þó að fræðsluna á meðal unglinga megi efla enn frekar. Þórólfur segir að þrátt fyrir þær jákvæðu fréttir að enginn hafi greinst smitaður hér á landi á fyrri hluta ársins sé áfram mikilvægt að brýna fyrir ungu fólki að nota smokka í kynlífi. Ekki sé lengur hægt að uppræta þessa sýkingu og því forvarnir mjög mikilvægar.