Ný lög auka vöruábyrgð verslana

Verslanir eru ábyrgar fyrir því að vörur sem þær selja fullnægi öryggiskröfum samkvæmt lögum sem nýlega tóku gildi. Í lögunum segir jafnframt að Löggildingarstofan geti stöðvað sölu á vörum sem kunna að hafa hættu í för með sér. Þetta kemur fram í fréttatilkynningu frá Samtökum verslunar og þjónustu. Lögin sem um ræðir er breyting á lögum um öryggi vöru og opinbera markaðsgæslu og tóku gildi í lok maí sl. Lögin ná aðeins til sérvöru sem sérlög gilda ekki um, eins og matvæli, lyf o.fl. Þannig ná lögin ekki til galla í matvöru en hins vegar til reiðhjóla, t.d. ef fótstigið dettur af við fyrstu notkun. Lögin ná einnig til vöru sem fylgir þjónustu. Þjónusta í þessu samhengi gæti t.d. verið aðili sem býður uppá hestaleigu og er þá ábyrgur fyrir því að reiðhjálmar sem hann lætur viðskiptavinum í té fullnægi öryggiskröfum. Komi í ljós að vara geti valdið skaða ber versluninni sem seldi vöruna að tilkynna um það til Löggildingastofu sem tekur ákvörðun um framhaldið. Önnur nýjung í lögunum er ákvæði um að hafi verið settir staðlar um öryggi og virkni vöru hér á landi, verði varan að vera þeim eiginleikum gædd sem staðlarnir segja til um. Annars er ekki leyfilegt að selja hana. Lögin kveða einnig á um merkingar og framsetningu vörunnar. Þannig þarf að vera fyrirsjáanlegt hvaða afleiðingar notkun vörunnar hefur og varnaðarorð ef um það er að ræða. Ef upp kemur vafi um hvort framleiðandi hefur sett nægjanlegar upplýsingar af þessu tagi á umbúðirnar gæti verið ráðlegt að skjóta málinu til Löggildingastofu eða viðkomandi eftirlitsstjórnvalds. Samkvæmt upplýsingum frá Löggildingastofu verða bráðlega birtar nánari upplýsingar um vinnulag og meðferð þessara mála á heimasíðu stofnunarinnar, www.ls.is. Löggildingastofan mun einnig á næstunni halda kynningarfund þar sem farið verður yfir málið.