Ólíklegt að Bush breyti ákvörðun

Afar ólíklegt er að Bush Bandaríkjaforseti breyti ákvörðun Bandaríkjahers um breytingar á Keflavíkurstöðinni. Íslendingar geti í besta falli vonast eftir einhvers konar frestun í kurteisisskyni, til að bjarga andliti íslenskra stjórnvalda, segir bandarískur sérfræðingur í varnarmálum. Heimildarmenn fréttastofu og sérfræðingar sem rætt hefur verið við í dag segja Bandaríkjamenn hvorki hafa breytt stefnu sinni hvað Keflavíkurstöðina varðar, né hafi þeir það í hyggju. Breytingar eftir höfði varnarmálaráðuneytisins í Washington séu óhjákvæmilegar, enda sé heimurinn annar nú en þegar Keflavík var í miðri skotlínu milli Moskvu og Washington. Chris Prebble stjórnar rannsóknum á utanríkisstefnu Bandaríkjanna hjá hinni virtu rannsóknarstofnun CATO í Washington. Hann segir að Íslendingar ættu að fagna því að vera ekki lengur í miðju Kalda stríðinu og að þörfin á hernum væri ekki sú sama og áður. Hann segir niðurskurðastefnu Bandaríkjamanna bæði rétta og nauðsynlega. Hann segir að ræða hefði mátt málin fyrr en það hefði því miður ekki verið gert. Það væri erfitt að halda úti mörgum herstöðvum og kæmi niður á stríðsrekstri Bandaríkjanna og baráttu þeirra við hryðjuverk. Prebble þykir mjög ólíklegt að forsetinn sé á öðru máli en herráðið og að hernaðarlegar þarfið ættu að ráða mestu um ákvörðun forsetans. Helmut Sonnenfeldt hjá Brookings-stofnuninni telur að Bandaríkjamenn vilji þó ekki hverfa með öllu frá Íslandi.