Rannsókn ábótavant

Rannsókn á sifjaspellsmáli í Færeyjum vegna barna sem búið hafa á Íslandi undanfarin ár var ábótavant að mati nýs saksóknara í málinu. Hjón voru ranglega dæmd í fangelsi og var dómurinn eingöngu byggður á vitnisburði barna sem nú segjast hafa logið fyrir dómi. Danskur áfrýjunardómstóll hefur vísað máli færeyskra hjóna, sem voru dæmd í fangelsi fyrir að hafa beitt börn sín kynferðislegu ofbeldi, aftur til dómstóls í Færeyjum. Konan er móðir barnanna en maðurinn stjúpfaðir. Ungmennin, sem búsett eru á Íslandi, viðurkenndu löngu eftir að hjónin afplánuðu dóma sína að hafa logið upp á móður sína og stjúpa og kenna þau stjúpmóður sinni um að hafa þvingað sig til að segja ósatt fyrir dómi. Varla þarf að taka fram að hér er um háalvarlegt mál að ræða en kynferðislegt ofbeldi á börnum er með andstyggilegri brotum í samfélaginu. Dómurinn hafði hrikalegar afleiðingar í för með sér fyrir hjónin, móðirin hlaut tveggja ára og stjúpfaðirinn níu mánaða fangelsisdóm, að frátöldum smánarblettinum sem fylgir brotum sem þessum. Þau skildu í kjölfarið og býr konan í Danmörku en maðurinn í Færeyjum. Málið verður tekið upp í Eystri landsrétti í haust en rannsókn á því sem gerðist í raun og veru hefur staðið yfir síðustu misserin. Linda Hestelberg, nýr saksóknari í málinu í Færeyjum, sagði í samtali við fréttastofu að svo virtist sem upphafleg rannsókn í máli gegn hjónunum hefði verið ábótavant. Vitnisburður barnanna hafi einfaldlega verið tekinn trúanlegur þó engin önnur gögn hafi bent til sektar móðurinnar og eiginmanns hennar. Nú þegar málið hefur verið rannsakað að nýju hefur þvert á móti komið í ljós að svo virðist sem ný frásögn ungmennanna eigi við rök að styðjast - það hafi verið stjúpmóðirin, sem einnig býr hér á landi, sem hafi beitt þau bæði líkamlegu og andlegu ofbeldi. Hún hefur verið ákærð og verður dregin fyrir rétt í haust. Ungmennin eiga einnig yfir höfði sér ákærur fyrir að bera ljúgvitni fyrir dómi. Björn frá Heygum, lögmaður mannsins í Færeyjum, sagði í samtali við fréttastofu í dag að málið sýndi hve vafasamt væri að byggja dóma eingöngu á vitnisburði. Það væri þó gleðiefni að málið yrði tekið upp að nýju og réttir aðilar dregnir til ábyrgðar. Hitt er svo annað mál að allir málsaðilar hljóta að velta fyrir sér hvort nýr framburður ungmennanna sé hinn rétti. Félagsfræðingar sem fréttastofan ræddi við benda á að ýmsar aðrar ástæður geta hafa valdið því að börnin breyttu framburði sínum.