Umferðaróhöpp í gær og nótt

Harður árekstur varð á Suðurlandsvegi við gatnamót Þrúðvangs á Hellu þar sem bifhjól og bíll skullu saman. Áreksturinn var nokkurð harður og var ökumaður bifhjólsins fluttur á sjúkrahús í Reykajvík. Þá fór lítil fólksbifreið út af Suðurlandsvegi, rétt austan við Gunnarsholtsafleggjara, og á umferðarmerki sem þar eru. Óhappið varð með þeim hætti að litlum jeppa var nauðhemlað fyrir framan bifreiðina og greip ökumaður hennar til þess ráðs að stýra bifreið sinni út af veginum. Engin alvarleg meiðsl urðu á fólki. Í Hrútafirði gjöreyðilagði ökumaður bíl sinn þegar hann ók út af veginum við bæinn Þóroddsstaði. Bíllinn fór margar veltur og reif niður girðingar í leiðinni. Ökumaðurinn gekk nánast óskaddaður út úr bílnum og var færður á lögreglustöð vegna gruns um ölvun við akstur. Lögreglan biður alla ökumenn að sýna þolinmæði og tillitsemi nú þegar fjöldi fólks hugar að heimför eftir eina mestu ferðahelgi ársins. Ökumenn eru minntir á að fara ekki of snemma af stað eftir áfengisneyslu næturinnar en algengt er að ökumenn séu stöðvaðir í akstri að morgni í þannig ástandi að þeir eru ekki hæfir til aksturs.