Kiran Pacific á síðasta séns

"Þetta gat ekki farið betur miðað við aðstæður," sagði Helgi Jensson, hjá Umhverfisstofnun, skömmu eftir að tyrkneska súrálsflutningaskipið Kiran Pacific losnaði af strandstað á þriðja tímanum í gær. Eftir að skipið losnaði hafði ekki orðið vart við olíuleka eða mengun frá skipinu. Skipið strandaði á skeri 3,3 sjómílum norðvestur af Straumsvíkurhöfn á laugardagskvöld. Að sögn Halldórs Nellett, skipherra á varðskipinu Ægi, var háflóð og aðstæður góðar þegar skipið losnaði af skerinu. Lofti hafði verið dælt í tanka skipsins og dró dráttarbáturinn Hamar frá Hafnarfirði skipið af skerinu. "Það eru göt á skipinu og það þarf að mynda þau og athuga hvort ekki sé hægt að sjóða utan á þau. Við höfum ekki aðstöðu til að taka svona stórt skip upp þannig að því verður að sigla til annars lands þegar það er tómt," segir Þór Kristjánsson, deildarstjóri hjá Siglingastofnun. Aðspurður sagði Þór skipið ekki vera á válista. Það hafi hins vegar verið stöðvað tvisvar á tveimur síðustu árum í höfnum þar sem Parísarsamkomulagið nær yfir og ef það verður stöðvað einu sinni enn fer það á bannlista. Ekki fengust upplýsingar um af hverju skipið hefði tvívegis verið stöðvað. Til að skip sé stöðvað þurfa að vera gerðar alvarlegar athugasemdir, til að mynda ef pappírar eða öryggisbúnaður eru ekki í lagi. 21 land í Evrópu er í Parísarsamkomulaginu sem vinnur eftir ákveðnum reglum og gefur upplýsingar um skip sín á milli. Siglingastofnun skoðar 25 prósent allra erlenda skipa sem hingað koma og þurfa lausafarmsskip sem eru tólf ára eða eldri eins og Kiran Pacific að fara í víðtæka skoðun einu sinni á ári. Tími var fyrir Kiran Pacific að fara í víðtæka skoðun og hafði skipstjóri skipsins pantað slíka skoðun hér áður en skipið strandaði og verður byrjað á skoðuninni í dag.