Oriana varð frá að hverfa

Eitt stærsta skemmtiferðaskip heims, Oriana, varð að hverfa frá ytri höfninni í Reykjavík vegna hvassviðris nú upp úr hádegi. Vindhviður fóru yfir 20 metra á sekúndu og var af öryggisástæðum ákveðið að skipið létti akkerum og sigldi út á Faxflóa og bíður skipið þar þess nú að veður lægi. Á annað þúsund farþegar eru hins vegar strandaglópar í landi og er óvíst hvenær hægt verður að ferja þá aftur um borð. Oriana kom inn á ytri höfnina klukkan sjö í morgun en áætlum gerir ráð fyrir að skipið haldi áfram för klukkan hálf sjö í kvöld. Óvíst er einnig hvort sú áætlun geti staðist. Oriana er 69 þúsund tonn að stærð og 260 metrar á lengd.