Hægt að fækka um 100 rúm á LSH

"Við höfum sagt það, að ef við losnum við allar þessar stíflur sem hindra að við getum látið starfsemina á spítalanum fljóta eðlilega á milli þjónustustiga, þá væri hægt að fækka plássum spítalans um 12 - 13%, eða allt að hundrað," sagði Jóhannes M. Gunnarsson framkvæmdastjóri lækninga á Landspítala háskólasjúkarhúsi. Nú eru rúmlega 900 rúm á spítalanum. Jóhannes er formaður forstjóranefndar sem nýverið skilaði skýrslu um breyttar áherslur að hluta til á starfi spítalans. Nefndin segir nauðsynlegt að efla ferliverkastarfsemi á LSH. Fjölbreytt göngu- og dagdeildastarfsemi sé nú þegar til staðar á spítalanum. Er það niðurstaða nefndarinnar að hana þurfi enn að efla verulega, einkum til að stuðla að frekari hagræðingu í rekstri spítalans með því að fækka innlögnum og stytta legutíma, en jafnframt vegna háskólahlutverks spítalans. Ferliverk á LSH eru unnin á göngudeildum og dagdeildum. Á göngudeildir koma þeir sem ekki þurfa að leggjast inn til meðferðar. Á dagdeildir koma sjúklingar sem þurfa að leggjast inn til meðferðar og eftirlits, en dveljast ekki yfir nótt. Nefndin hefur lagt fram margar og ítarlegar tillögur. Meðal annarra, að leitað verði eftir því við heilbrigðisyfirvöld að fjármögnun vegna göngudeildarþjónustu spítalans verði breytt og upp verði teknar verktengdar greiðslur til spítalans vegna göngudeildarverkefna í stað árlegra heildargreiðslna. Uppbygging sérhannaðs húsnæðis fyrir ferliverkastarfsemi verði eitt af forgangsverkefnum við hönnun og byggingu nýs húsnæðis spítalans. Jóhannes sagði ákveðnar forsendur, til viðbótar þeim, er að ofan greindi, þurfa að vera fyrir hendi til að hægt væri að fækka plássum á spítalanum. Meðal annars þyrfti að leysa þann vistunarvanda, sem fyrir hendi væri. Þá þyrfti að koma upp sjúkrahóteli sem væri í beinum tengslum við sjúkrahúsið.