Samstarf við gagnabanka

Barnaheill og fleiri samtök eru komin í samstarf við evrópskan gagnabanka sem auðveldar aðstandendum barna sem týnast, strjúka eða verða fórnarlömb kynferðisofbeldis, að bregðast við. Faðir eins fórnarlambs belgíska barnaníðingsins Marc Dutroux stofnaði samtökin sem heita Child Focus. 35 manns vinna hjá samtökunum í dag við að aðstoða foreldra og aðstandendur barna sem hafa týnst, strokið eða orðið fyrir kynferðislegu ofbeldi innan fjölskyldu eða utan. Samtökin eru í formlegu samstarfi við dóms- og lögregluyfirvöld í Belgíu og hafa sannað gildi sitt. Tessa Schmidburg, talsmaður Child Focus, segir að fyrstu tvö árin hafi verið erfið þar sem þau urðu að sannfæra yfirvöld um að samtökin væru ætluð til að hjálpa og veita stuðning, en myndu ekki skipta sér af rannsókn mála. Hún segir að á sex árum hafi samtökin sannað tilverurétt okkar. Verið er að koma á stofn evrópskum gagnabanka yfir samtök sem sinna málefnum af þessu tagi í flestum löndum, en hér á landi eru það Barnaheill, Stígamót og Kvennaathvarfið sem fara í hann, sem sjá mikið gagn í þeim upplýsingum sem þar er að finna. Hrönn Þormóðsdóttir, verkefnisstjóri Barnaheilla segir að slíkur gagnabanki myndi vissulega auðvelda fólki að nálgast hjálp. Þá segir hún að með samstarfi frjálsra félagasamtaka milli landa og frjálsra félagasamta við lögregluyfirvöld í hverju landi fyrir sig auðveldi málin verulega Eins og fyrr segir var Child Focus stofnað í kjölfar Dutrouxmálsins, en Dutroux var dæmdur í lífstíðarfangelsi í vikunni. Tessa segir öll belgísku þjóðina vera ánægð með að þessu sé lokið og að hann fari í lífstíðarfangelsi, mikilvægast sé þó að koma í veg fyrir að þetta gerist aftur.