Hreindýr við Kárahnjúka

Þeir sem hyggjast skoða framkvæmdirnar við Kárahnjúka hafa góða von um að sjá hreindýr í leiðinni. Þegar fréttastofa var á ferð við Kárahnjúka rákumst við á hreindýr á Fljótsdalsheiði og voru nokkur í aðeins um 200 metra frá þjóðveginum. Hreindýr sáust á þremur stöðum á leiðinni enda eru menn komnir þarna á helstu hreindýraslóðir landsins. Það er auðvitað ekki öruggt að menn sjái hreindýrin í sínu villta umhverfi um leið og menn skoða Kárahnjúka en býsna góðar líkur. Fjallahringurinn er enn ein ástæðan til að leggja í slíkan bíltúr. Snæfell, hæsta fjall Íslands utan meginjökla, gnæfir yfir heiðinni og þarna er drottning íslenskra fjalla, sjálf Herðubreið, sem ber í annan Kárahnjúkinn. Ef skyggnið er gott blasa einnig við á leiðinni Vatnajökull, Kverkfjöll, Askja, Dyngjufjöll og Kollóttadyngja. Það er hins vegar orðið of seint að sjá hrikalegasta gljúfur landsins ósnortið. Menn hafa hins vegar enn þá tvö ár til að sjá svæðið ofan Kárahnjúka áður en því verður sökkt á kaf í virkjunarlón en byrjað verður að safna vatni í lónið haustið 2006.