Loðnan mætt á svæðið

Fyrsta loðnan á þessari sumarvertíð er komin að bryggju í Bolungarvík um borð í loðnuskipinu Gullbergi VE, og er löndun að hefjast. Skipið fékk fullfermi, eða rúm 1200 tonn norður af Horni. Flugmaður tók eftir því í fyrrakvöld að háhyrningar voru þar í æti, sem reyndist vera loðna. Fjögur önnur skip eru nú komin á svæðið og hefur að minnsta kosti Súlan EA þegar fyllt sig og er á landleið. Hafrannsóknaskipið Árni Friðriksson er lagt af stað frá Reykjavík til að gera mælingar á vettvangi og taka sýni. Ekki er enn ljóst hvort um verulegt magn er að ræða og heldur alls ekki víst að vertíðin sé að hefjast af fullum krafti. Það var sjómönnum afar mikill léttir að finna þessa loðnu, þar sem ekkert hefur fundist þrátt fyrir leit af og til síðustu vikur og mánuði. Svo virðist að eftir því sem sjórinn fer hlýnandi hér við land haldi loðnan sig lengur í köldum sjó nær Grænlandi, en gangi ekki hingað að landinu fyrr en fer að nálgast hrygningu.