Flugriti og hljóðriti sendir út

Flugriti og hljóðriti Dornier-flugvélarinnar, sem magalenti á Siglufjarðarflugvelli í fyrrakvöld, verða sendir út til rannsóknar í Bretlandi í dag og niðurstöðu er að vænta á þriðjudag. Vélin er hugsanlega ónýt. Rannsóknarnefnd flugslysa hefur ekki enn tekið fullnaðarskýrslu af flugmönnunum tveimur, sem voru um borð, en það verður væntanlega gert á mánudag. Reynt verður að ná vélinni af flugbrautinni í dag, en hún lokar fyrir flugumferð um völlinn. Fulltrúi Rannsóknanefndar flugslysa verður þar viðstaddur. Í ljós er komið að vélin er mun meira skemmd en talið var í fyrstu og er tryggingafélag vélarinnar að meta hvort það borgi sig að gera við hana, eða dæma hana ónýta. Ljóst er að skrúfublöð annars hreyfilsins, að minnsta kosti , hefur rekist niður í flugbrautina þannig að annar eða jafnvel báðir hreyflarnir, eða mótorarnir, eru ónýtir. Vélin verður væntanlega flutt sjóleiðina til Reykjavíkur. Til stendur að Íslandsflug fái vél á leigu hjá Flugfélagi Íslands til að byrja með.