Sverðið þunga fær að rísa

Borgarráð hefur gefið leyfi fyrir því að risastóru víkingasverði verði komið fyrir á hringtorginu við Þjóðminjasafnið í hálft ár til að kynna opnun safnsins. Snorri Már Skúlason, kynningarstjóri safnsins, segir vonbrigði að leyfið sé einungis tímabundið. Ætlunin var að setja upp sverðið fyrir opnunina sem er 1. september en upphaflega átti þó sverðið einungis að standa í þrjá mánuði. Þá átti að nota trefjaplast og dúk. Á seinni stigum fóru menn hinsvegar að kunna svo vel við hugmyndina að þeir vildu láta steypa upp sverðið og hafa það til frambúðar. Samtök myndlistarmanna og samtök arkirtekta settu sig upp á móti sverðinu og sögðu það fremur auglýsingatákn en listaverk. Stjórnmálamenn hafa hinsvegar verið jákvæðir. Þjóðminjasafnið hefur nú frestað því að taka endanlega ákvörðun um víkingasverðið sem átti að vera eftirlíking af einum helsta dýrgripi safnsins, sem fannst við Kaldárhöfða í Grímsnesi á fimmta áratugnum, og á rætur að rekja til fyrri hluta tíundu aldar. Endanleg ákvörðun verður þó tekin innan hálfs mánaðar.