Aftaka á íslenskri vefsíðu

Myndband sem sýnir uppreisnarmenn í Írak taka gísl af lífi með hrottafengnum hætti var að finna á einni vinsælustu vefsíðu íslenskra unglinga í dag. Umboðsmaður barna gerði athugasemd til lögreglu sem fór fram á að myndbandið yrði fjarlægt. Vefsíðan Tilveran.is höfðar aðallega til unglinga og er hún fjölsótt af ungu fólki allt niður fyrir 10 ára aldurinn. Í gærkvöld var sett inn á síðuna myndband sem sýnir í smáatriðum hvernig suðurkóreski gíslinn Kim Song Il er hálshöggvinn á hrottafenginn hátt en hann hafði verið í haldi hjá íslömskum uppreisnarhópi í Írak. Myndbandið sýnir aftökuna frá upphafi til enda, eða frá því að Kim Song Il biðst vægðar og þar til einn uppreisnarmannanna tekur upp sveðju og sker af honum höfuðið. Enda þótt Netið sé í eðli sínu alþjóðlegt og mögulegt að ná í alls kyns efni frá síðum um allan heim vakti það athygli að víðast annars staðar virðist a.m.k. varað við svona efni en það var ekki gert á Tilverunni. Reyndar var eina viðvörunarorðið, ef svo má segja, hið enska orð „sick“ en líklega hefur það frekar aukið áhuga ungmenna á að sjá myndbandið. Umboðsmaður barna, Þórhildur Líndal, sá þessa síðu í dag og varð mjög brugðið. „Ég hafði sambandi við Lögregluna í Reykjavík í morgun og bað þá um að koma í veg fyrir að þetta myndband yrði áfram inni á heimasíðunni,“ segir Þórhildur og bætir við að það sé fyrir neðan allar hellur að hafa svona myndir inni á íslenskri vefsíðu og það yrði að spyrna við fótum svo svona endurtaki sig ekki.   Lögreglan í Reykjavík hafði samband við rétthafa síðunnar í dag og nú rétt fyrir fréttir var búið að fjarlægja þetta óhugnanlega myndband.