Ísland, dýrast í heimi

Ísland er dýrasta ferðamannaland í heimi og Egyptaland það ódýrasta, samkvæmt útreikningum breska fyrirtækisins ECA fyrir norska blaðið Verdens Gang. Þar er ferðamannavísitalan stillt á hundrað í Noregi, og skoðað í allar áttir. Þannig kostar þjónusta upp á hundrað krónur í Noregi, rúmar 106 krónur á Íslandi, en aðeins rúmar 33 krónur í Egyptalandi. Í vísitölunni vega fljótandi vörur eins og bensín og áfengi þungt og sömuleiðis matur. Matar- og áfengisverð er metið bæði í verslunum og á veitingastöðum. Japan er næst dýrasta landið, en hin Norðurlöndin eru öll mjög ofarlega á lista. Bandaríkin eru í 35. sæti, þar sem hundrað krónu þjónusta í Noregi kostar aðeins 67 krónur. Verðkönnunin var yfirleitt gerð í helstu borgum viðkomandi landa en sumstaðar í löndunum í heild. Tiltölulega lítill munur er þó á landstölum og tölum frá helstu borgum. Könnunin er gerð í ljósi þess að flugfargjöld verða stöðugt ódýrari þannig að verðlag í landinu, sem heimsótt er, skiptir æ meira máli í heildarkostnaði ferðarinnar.