Vísað úr landi innan viku

Þrír Palestínumenn sem sluppu úr gæsluvarðhaldi í gær voru handteknir aftur þegar í stað vegna annarrar kæru og þeim úthlutaðir nýr lögmaður, þvert á óskir þeirra. Fyrri lögmenn fengu ekkert að vita um afdrif skjólstæðinga sinna. Mennirnir komu hingað til lands með Norrænu í byrjun maí og framvísuðu fölsuðum eða stolnum vegabréfum við komuna til landsins. Þeir voru handteknir, óskuðu þá eftir hæli, og segjast vera Palestínumenn. Lögreglu grunaði hins vegar að þeir tengdust alþjóðlegri glæpastarfsemi, einkum skipulögðum fólksflutningum til Kanada og Bandaríkjanna. Því voru þeir úrskurðaðir í þriggja vikna gæsluvarðhald, sem rann út í gær. Í gærmorgun var þeim sleppt, en samkvæmt heimildum fréttastofu biðu þeirra þá menn á vegum ríkislögreglustjóra og handtóku þá. Lögmönnum Palestínumannanna barst tilkynning um að þeim hefði verið sleppt þegar í gær, og áttu von á því að skjólstæðingar sínir væru frjálsir þegar einn þeirra forvitnaðist um hagi þeirra síðdegis sama dag. Fyrst þá kom í ljós að þeir voru í Héraðsdómi Reykjavíkur, þar sem útlendingastofnum fór fram á varðhald uns þeim yrði vísað úr landi. Jón Einar Jakobsson, sem er lögmaður eins Palestínumannanna, undraðist þetta mjög, og krafði lögmann lögreglunnar svara um hvers vegna verjendur mannanna og lögmenn hefðu ekki verið látnir vita. Þá var honum tilkynnt að mennirnir hefði fengið nýjan, sameiginlegan lögmann, ekki þó að eigin ósk, heldur þar sem að þeir krossuðu í reit á blaði sem yfirvöld fengu þeim í hendur. Um nýtt mál væri að ræða, sem nýr talsmaður, eins og það heitir í útlendingalögum, sinnti. Tveir Palestínumannanna hafa neitað þessu í samtali við verjendur sína, segjast hafa krafist þess að tala við verjendurna og ekki skrifað undir neitt. Nýi talsmaðurinn, Guðbjarni Eggertsson, fékk tilkynningu um málið klukkan tíu í gærmorgun. Hann þurfti að mæta til skýrslutöku klukkan ellefu og í Héraðsdóm upp úr klukkan eitt síðdegis. Hann sagði í samtali við fréttastofu að þessi skammi frestur væri bagalegur og bæði óheppilegt og óvenjulegt að nýr lögmaður væri kallaður til með þessum hætti, í stað þeirra lögmanna sem annast hafa mál mannanna og þekktu forsöguna. Að vísu sé mál útlendingastofnunar að forminu til óskylt rannsókn lögreglunnar, en að íslensk yfirvöld skuli með þessum hætti fá menn til að krossa í kassa, án þess að þeir hafi hugsanlega fullan skilning á því hvað þeir séu að gera, er undarlegt að mati Guðbjarna. Verjendur Palestínumannanna hafa meðal annars vakið athygli fyrir harðan framgang í málinu undanfarna daga, en þeir kröfðust þess fyrir Hæstarétti að fá aðgang að hluta málsgagna, sem lögreglan vildi ekki afhenda. Eftir úrskurð Hæstaréttar reyndist lögmönnunum þó enn erfitt að fá lögregluna til að afhenda gögnin. Guðbjarni Eggertsson segir að Palestínumönnunum verða vísað úr landi innan viku, vegna fölsuðu vegabréfanna, en sá úrskurður hefur verið kærður til dómsmálaráðuneytisins. Alls er óvíst að sá úrskurður komi áður en mönnunum verður vísað úr landi.