World Press Photo í Kringlunni

Ljósmyndasýningin World Press Photo var opnuð í Kringlunni í dag og stendur til 18. júlí. World Press Photo samkeppnin hefur verið haldin árlega síðan árið 1955 og er stærsta keppni sinnar tegundar. 4176 atvinnuljósmyndarar frá 124 löndum tóku þátt í ár. Rúmlega 63 þúsund myndir voru sendar inn sem er þátttökumet. Dómnefndin veitti 62 ljósmyndurum verðlaun í 10 efnisflokkum og koma verðlaunahafar frá eftirfarandi 23 löndum: Ástralíu, Bandaríkjunum, Belgíu, Bretlandi, Danmörku, Finnlandi, Frakklandi, Hollandi, Indónesíu, Íran, Írlandi, Ítalíu, Japan, Kanada, Kína, Kólumbíu, Kúbu, Palestínu, Rússlandi, Spáni, Svíþjóð, Tékklandi og Þýskalandi. Verðlaunamyndirnar í World Press Photo hafa verið sýndar hér á landi árlega síðan 1984, fyrst í Listasafni ASÍ, en í ár verður sýningin haldin í 14. sinn í Kringlunni.Í ár verður sýning á verðlaunamyndunum sett upp á um 80 stöðum um heim allan og er áætlað að yfir milljón manns sjái sýninguna. Sýningunni World Press Photo er skipt í flokka og veitt verðlaun fyrir þrjár bestu myndirnar í hverjum flokki, bæði fyrir myndaraðir og einstakar myndir. Sýningin er flokkuð í fréttaskot, fólk í fréttum, vísindi og tækni, daglegt líf, íþróttir, listir, náttúra og umhverfi, almennar fréttir og að lokum er einni mynd veitt verðlaun sem valin er af sértakri dómnefnd einungis skipuð börnum. Alls eru nálægt 200 myndir sýndar og eru allar verðlaunamyndirnar á sýningunni í Kringlunni. Við hverja mynd er ítarlegur texti um myndefnið á íslensku. Fréttaljósmynd ársins er eftir franska ljósmyndarann Jean-Marc Bouju frá The Associated Press. Myndin sýnir írakskan fanga hugga fjögurra ára son sinn í stríðsfangabúðum nálægt An Najaf í Írak. Myndin var tekin 31. mars 2003.