Sniglar gefa blóð

Það brá mörgum í brún þegar mikilúðlegur hópur manna kom drynjandi á vélhjólum að húsi við Eiríksgötu klukkan hálf sex í kvöld. Þar voru Sniglarnir á ferð til að gefa blóð. Það drundi vel í stálfákum Sniglanna þegar hópurinn renndi í hlað, enda hjólin hvert öðru stærra og kraftmeira. Og það vita jú allir að það á að heyrast í mótorhjólum. Stundurm er sagt að blóðið frjósi í æðum manna þegar þeir verði mjög hræddir. Sem betur fer þarf enginn að vera hræddur við Sniglana enda væri óþægilegt að blóðið frysi í æðum manna í Blóðbankanum. Verslunarmannahelgin er framundan, mesta ferðahelgi ársins. Þá geta orðið alvarleg slys í umferðinni og því þörf fyrir blóð. Sniglarnir, Bifhjólasamtök lýðveldisins, ákvað því að fjölmenna í Blóðbankann. Þeim rann blóðið til skyldunnar, ef þannig má að orði komast. Snigillinn Ragnar Stefán Halldórsson segir einn félagsmanna hafa lent í slysi nýverið og þrettán lítra af blóði hafi þurft til að bjarga honum. Þeim hafi því fundist þetta kærkomið tækifæri til að efla hópinn og gefa blóð.  Sniglarnir eru þekktir fyrir að vera skylduræknir og góðir ökumenn og blóðgjöfin í dag er enn einn góður málstaður sem þeir leggja lið. Hægt er að horfa á fréttina úr fréttum Stöðvar 2 með því að smella á hlekkinn hér að neðan. Ljósmyndin er úr myndasafni.