Fjármálaráðherra greip inn í

Fjármálaráðherra greip inn í deilu tollayfirvalda og akstursíþróttamanna um tryggingafé vegna heimsbikarsins í torfæru um helgina. Þar af leiðandi var hætt við að aflýsa keppninni. Landssamband íslenskra akstursfélaga segir málið engu að síður til skammar. Vegna heimsbikarsins í torfæru, sem var á dagskrá á Reykjanesi og Hellu um helgina, kröfðust tollayfirvöld 25 milljóna króna í tryggingafé vegna komu erlendra keppnisbifreiða til landsins. Akstursíþróttamenn gagnrýndu þessa háu upphæð, þar sem í raun væri um ferðamannabíla að ræða, og að ökuþórar hefðu hingað til eingöngu þurft að fylla út eyðublöð þegar keppnisbílarnar hefðu komið með Norrænu til landsins. Í gær hafði ekki tekist að leysa deiluna um tryggingarféð og var því hætt við að halda heimsbikarkeppnina. En hreyfing komst á málið að nýju með aðstoð Árna Sigfússonar, bæjarstjóra í Reykjanesbæ, og samið var um 15 milljóna króna tryggingu. Árni segir að aksturíþróttamenn hafi þurft að klífa brattari brekkur en þetta en aðalatriðið sé að málið er leyst. Bæjarstjórinn talaði m.a. við fjármálaráðherra og segir hann hafa sýnt málinu mikinn skilning. Ólafur Guðmundsson, stjórnarmaður í Landsambandi íslenskra akstursfélaga, segist ánægður yfir að málið hafa endað farsællega en segist hins vegar vera óánægður með endurtekinn vandræðagang með að koma torfærubílum inn í landið. Að sögn Ólafs er þetta í fimmta skipti á síðustu 10-15 árum sem slíkt á sér stað og hann segir aldrei nein vandamál vera til staðar þegar farið er með bíla héðan til annarra landa. Þetta sé okkur því til skammar og hann hyggst ræða við fjármálaráðuneytið.