Milljarðatugir í húfi

Spara má milljarða króna árlega með skilvirkri stjórn opinberra stofnana. Slík er reynsla Breta sem gefur vísbendingar um að ná megi fram miklum sparnaði hér. "Ein regla sem Bretar eru að sjá er að ef starfsemin er skilvirk og hluti hennar boðinn út þá ná stjórnvöld að minnsta kosti 15 prósenta sparnaði," segir Þór Sigfússon, framkvæmdastjóri Verslunarráðs Íslands, um mögulegan sparnað í rekstri opinberra stofnana. Þór segir nokkur atriði sem gott sé að hafa í huga þegar kemur að því að tryggja skilvirkni stofnana og sparnað í rekstri þeirra. "Það er alltaf talað um hvað eigi að gera við þessar stofnanir sem fara ár eftir ár fram úr. Nú er búið að leggja til að það sé auðveldara að segja upp almennum starfsmönnum ríkisins. Við teljum að það sé mjög eðlilegt að það séu líka aukið svigrúm til að segja upp forstöðumönnum stofnana standi þeir ekki sína plikt," segir Þór og bætir við að breyta ætti lögum þannig að enginn vafi leiki á að "ef forstöðumenn eru með framúrkeyrslu ár eftir ár, eru áskrifendur að umframfjárlögum, þá eigi að vera hægt að segja þeim upp". Annað sem málið snýr að eru stofnanirnar sjálfar. "Það hefur gengið langbest að fækka stofnunum. Þær eignast sitt eigið líf oft á tíðum," segir Þór. Þór segir erfitt að tiltaka ákveðna tölu um ákveðinn sparnað þar sem sumar stofnanir séu vel reknar og haldið innan fjárheimilda meðan aðrar keyri aftur og aftur fram úr fjárlögum. "Á stofnanaþættinum gæti þetta verið allt að tuttugu milljarðar. Það gæti náðst slíkur sparnaður ef það yrði farið í þetta ferli. "Viðskiptalífið er að gera þetta hvern einasta dag. Ef þetta væri Íslands hf.: Hvað myndum við gera til að ná endum saman? Það er ekkert endilega að það þurfi að hækka skatta heldur má skoða miklu fremur gjöldin. Þar má gera mikið, mikið betur. Það er bara ekki í tísku núna, því miður, að fást við útgjöld," segir Þór.