Kjarasamningar sliga landvinnslu

Framkvæmdastjóri Vinnslustöðvarinnar segir kjarasamninga við sjómenn skýra bága stöðu landvinnslu. Hann spáir endalokum landvinnslu ef samtök sjómanna ljái ekki máls á breytingum á hlutaskiptakerfinu. Formaður Sjómannasamtakanna segir þennan málflutning ómálefnalegan. "Kjarasamningar við sjómenn skýra að verulegu leyti bága stöðu fiskvinnslu í landi. Hlutaskiptakerfi sjómanna stendur landvinnslunni fyrir þrifum," sagði Sigurgeir B. Kristgeirsson, framkvæmdastjóri Vinnuslustöðvarinnar í Vestmannaeyjum, í erindi sínu á nýafstöðnum aðalfundi Samtaka fiskvinnslustöðva. Erindi Sigurgeirs fjallaði um stöðu fiskvinnslunnar með hliðsjón af launakerfi sjómanna og mismunandi samkeppnisstöðu landvinnslu og sjóvinnslu. "Þróun undanfarinna ára hefur verið að fiskvinnsla í landi hefur dregist saman. Ég held að þessi þróun muni halda áfram, að óbreyttu. Þess vegna gætum við orðið vitni að miklum og örlagaríkum sviptingum að þessu leyti á allra næstu árum," sagði Sigurgeir. Kom fram í máli hans að vanda fiskvinnslunnar mætti meðal annars rekja til þess að stéttarfélög sjómanna hefðu náð því fram í kjarasamningum á sínum tíma að festa fjölda manna í áhöfn skipa. "Ef hægt væri að fækka mönnum á þeim skipum sem afla fyrir landvinnslu væri hægt að minnka kostnað sem myndi koma landvinnslunni til góða, auk þess að borga sjómönnunum sem eftir væru hærri laun," sagði Sigurgeir í samtali við Fréttablaðið Nefndi Sigurgeir Sólbaksmálið í ræðu sinni og sagði álitaefni kristallast í því. "Sjómenn ríghalda í arfavitlaust hlutaskiptakerfi sem leiðir af sér að engin þróun er í landvinnslu og sjósókn ferskfisksskipa.," sagði Sigurgeir og bætti við: "Komi sjómannasamtökin ekki til móts við útvegsmenn og ljái máls á eðlilegri mönnun skipa og þá í samræmi við þörf, eins og fiskvinnslufólk hefur gert, mun fiskvinnsla í landi smám saman leggjast af:" Sævar Gunnarsson, formaður Sjómannasamtaka Íslands, segir málflutning Sigurgeirs ómálefnalegan og að það væri einfaldlega rangt hjá Sigurgeiri að hlutaskiptakerfi sjómanna stæði landvinnslunni fyrir þrifum. "Þessi maður er varamaður í stjórn Landssambands íslenskra útvegsmanna og er bara málpípa sambandsins. Ég held að þessi maður hafi ekki hundsvit á þessum málum og honum væri nær að koma í Karphúsið og ræða málin við okkur þar," sagði Sævar.