Radar sem mælir hraða snjóflóða

   Ákveðið hefur verið að setja upp mælitæki til mælinga á hraða snjóflóða á varnargörðunum á Flateyri. Um er að ræða radar sem mælir hraða snjóflóða úr Skollahvilft með svipaðri tækni og lögreglan notar við hraðamælingar á bílum. Þettur kemur fram á vef Bæjarins besta í dag. Tvö möstur fyrir radarloftnet verða sett upp á varnargarðinum undir Skollahvilft en stjórnbúnaður verður í aðveitustöð Orkubús Vestfjarða við Bót, neðan garðanna. Að sögn Tómasar Jóhannessonar, jarðeðlisfræðings hjá Veðurstofunni, er stefnt að því að hefja framkvæmdir við verkið í vikunni. Radarinn, sem er framleiddur af svissneska fyrirtækinu AlpuG, hefur þegar verið keyptur og var hann settur upp til prófunar á tilraunasvæði Norsku jarðtæknistofnunarinnar í Ryggfonn í Vestur-Noregi. Þar hafa niðurstöður úr honum verið bornar saman við niðurstöður ýmissa annarra mælitækja þegar snjóflóðum er komið af stað með sprengingum í rannsóknarskyni. Búnaðurinn verður síðan settur upp með haustinu. Tómas segir radarinn kostaðan af Ofanflóðasjóði en hann er settur upp í tengslum við evrópska rannsóknarverkefnið Satsie sem er fjármagnað af Evrópuráðinu og Ofanflóðasjóði hér á landi. Helstu rannsóknarstofnanir á sviði snjóflóða í Evrópu taka þátt í verkefninu sem miðar að því að auka skilning á eðlisfræði snjóflóða með beinum mælingum á flóðum í náttúrulegum farvegum, eins og segir í tilkynningu frá Veðurstofunni. „Á Flateyri eru einstæðar aðstæður til þess að rannsaka flæði snjóflóða sem falla á leiðigarða og þar hafa þegar fengist merkilegar mælingar á slíkum flóðum árin 1999 og 2000. Því var ákveðið að koma fyrir mælitækjum á Flateyri til þess að mæla hraða flóðanna en hraðinn er einna mikilvægasta stærðin sem ákvarðar hvernig leiðigarðar breyta stefnu snjóflóða sem á þá falla,“ segir Tómas. Radarinn greinir sjálfvirkt þegar snjóflóð fellur úr Skollahvilft og mun gera starfsmönnum Veðurstofunnar á Ísafirði og í Reykjavík viðvart um leið og það gerist. Að sögn Tómasar er hann óháður veðri og vinnur jafnt í myrkri sem dagsbirtu en svipaðir radarar eru notaðir víða í Ölpunum til þess að vara við snjóflóðum sem falla á vegi og járnbrautarteina.