Frábær fyrri dagur hjá Íslandi

Íslenska landsliðið í frjálsum íþróttum náði frábærum árangri á fyrri degi Evrópubikarmótsins sem fer fram á Laugardalsvellinum um helgina. Silja Úlfarsdóttir, Jón Arnar Magnússon og Þórey Edda Elísdóttir sigruðu öll í sínum greinum og fjölmörg persónuleg met íslensku keppendanna féllu. Silja hljóp 400 metra grindahlaup á 59,24 sekúndum í töluverðum mótvindi, en Þórey Edda var sú eina sem náði að fara yfir 4,20 metra í stangarstökkinu. Eftir það lét Þórey hækka ránna í 4,42 metra en felldi hún þá hæð í þrígang. Jón Arnar sigraði í langstökki með góðu stökki upp á 7,70 metra. Af árangri annarra einstakra keppenda bar hæst frábær tími Sunnu Gestsdóttur í 100 m hlaupi kvenna þar hún hljóp á 11,75 sekúndum, sem er undir gildandi Íslandsmeti, en því miður var meðvindur yfir leyfilegum mörkum og fæst metið því ekki staðfest. Bergur Ingi Pétursson kastaði 61,36 metra í sleggjukasti og bætti sinn persónulega árangur um tæpa þrjá metra. Með kastinu tryggði Bergur sér þátttökurétt á HM 19 ára og yngri. Guðmundur Karlsson landsliðsþjálfari segir árangur íslenska liðsins fara fram úr sínum björtustu vonum, sérstaklega þegar horft til þess að marga lykilmenn vantar í hópinn vegna meiðsla. „Þetta var glimrandi dagur og fólk að standa sig alveg frábærlega. Við erum að fá mun fleiri stig en ég gerði ráð fyrir, og þá sérstaklega karlarnir. Ég er mjög sáttur," sagði Guðmundur í samtali við Fréttablaðið í gær. Karlalandsliðið er í fimmta sæti af átta liðum eftir þennan fyrri dag og hefur hlotið 43 stig. Þetta er mun betri árangur en á síðasta ári, þegar liðið var í sjöunda sæti eftir fyrri daginn. Konurnar standa í stað; eru í 6. sæti með 40 stig. Guðmundur segir Þóreyju Eddu líta gríðarlega vel út þessa dagana og voru tilraunir hennar við 4,42 metra mjög góðar. „Ég held að það megi segja að hún hafi aldrei verið í betra formi," segir Guðmundur og er það góðs viti fyrir Ólympíuleikana í Aþenu sem haldnir verða í ágúst. Keppnin heldur áfram á Laugardalsvellinum í dag og þá munu Jón Arnar Magnússon og Einar Karl Hjartarsson verða í eldlínunni á meðal fjölda annarra, en mótið er það sterkasta sem nokkurn tíma hefur verið haldið á Íslandi.