Frítt í leikskóla fyrir fimm ára

Reykjavíkurborg hefur ákveðið að leggja um 100 milljónir á ári í gjaldfrjálst nám fyrir fimm ára börn hluta úr degi. Með því viðurkennir borgin leikskólana sem fyrsta skólastigið, fyrst sveitarfélaga Fimm ára börn fá þriggja klukkustunda undirbúning fyrir grunnskóla á dag gjaldfrjálst í leikskólum borgarinnar frá næsta hausti. Brúa á bil skólastiganna og koma upplýsingum um börnin áfram milli skólanna til að auðvelda börnunum breytingarnar og grípa fyrr inn í komi upp námsörðugleikar hjá þeim. Reykjavíkurborg verður fyrst sveitarfélaga landsins til að viðurkenna leikskólagöngu sem fyrsta skólastigið í verki, segir Sigrún Elsa Smáradóttir frá leikskólaráði, formaður nefndar um samþættingu skólastiganna. Þorlákur Björnsson, formaður leikskóla Reykjavíkur, segir kostnaðinn verða um 35 milljónir það sem eftir lifir árs en reiknað sé með 100 milljónum á ársgrundvelli. "Einkareknum leikskólum verður einnig boðið að taka þátt gegn því að veita börnunum þjónustuna gjaldfrjálst og er reiknað með tveggja milljóna kostnaði við það," segir Þorlákur. Bergur Felixson, framkvæmdastjóri Leikskóla Reykjavíkur, segir alla sem rætt var við hafa verið mjög jákvæða gagnvart breytingunum. "Það er verið að tryggja að börnunum finnist skólakerfið ekki eins ógnvægnlegt," segir Bergur. Í skýrslu nefndarinnar er lagt til að leikskólar vinni sérstaka námskrá fyrir fimm ára börn þar sem áhersla verði lögð á félags- og samskiptahæfni, hreyfingu, málrækt, myndsköpun, tónlist, umhverfi, menningu og samfélag. Ekki megi gleyma leiknum sem kennsluaðferð. Stjórnendur hvers leikskóla hafi lokaákvörðunarvald um hvernig námskrá hans líti út. Sigrún segir að nú taki nefnd skipuð sérfræðingum við starfi nefndarinnar. Hún skili endanlegum niðurstöðum í árslok. "Leikskólinn er búinn að samþykkja þetta fyrir sitt leyti. Það er búið að ræða þetta innan Reykjavíkurlistans og ég er ekki í nokkrum vafa um að þetta verði samþykkt."